Bi îdiaya Serdozgerê Komarê yê Enqereyê yê berê Yuksel Kocaman “hedef nîşan daye”, doz li Hevserokê Giştî yê Partîya Demokratîk a Gelan (HDP) ê berê Selahattîn Demîrtaş hatibû vekirin.

Danişîna dozê li 25’emîn Dadgeha Cezayên Giran a Enqereyê hat dîtin. Danişîn, bi tespîtkirina nasnameyê dest pê kir û hat dîtin ku endamên şandeyê hatine guherandin. Demîrtaş rapora tendirûstî û dîlekçeya mazeretê pêşkêşî dadgehê da û beşdarî danişînê nebû. Parêzerên Demîrtaş, Sîpan Cîzrelî, Kenan Maçoglû, Levent Kanat, Erdogan Aydin û Hadî Cîn ji bo parastinê beşdarî danişînê bûn. Dozger îdîa kir ku di danişîna 22’yê tîrmehê de Kocaman gelek caran weke hedef hatîye nîşandan û xwest ku Demîrtaş ji ber îdîaya “gef lê xwarin û ji hêza tirsnak a rêxistinên sûcê hêz girtîye” ji 2 salan heta 5 salan û ji sûcê “hedefgirtina kesên di têkoşîna li dijî terorê de cih girtin” jî ji salekî heta 3 salan bê cezakirin. Di danişînê de dozger axivî û mutalaaya xwe dubare kir. Dozger xwest ku danişînê bidin demekî nêz. Şandeya dadgehê rapora tenduristîyê û daxwaznameya hincetê ya Demîrtaş qebûl kir. Dadgeh pêşîyê xwest danişîna dozê bide 23’yê îlonê. Piştî berteka parêzeran serokê dadgehê danişîn taloqî 14’ê cotmehê kir.