Komîsyona Hiqûqê ya Partiya Demokratîk a Gelan (HDP) û parêzerên Aysel Tugluk derbarê biryara tehlîyeya Tugluk de li Rêxistina Bajêr a Amedê ya HDP’ê de civîna çapemenîyê li dar xist.

Alîkarê Hevserokê Giştî yê Berpirsyarê Hiqûq û Komîsyona Mafên Mirovan a HDP’ê Serhat Eren diyar kir ku Tugluk ji Kanûna 2016’an vir ve girtî ye û bi nexweşîya demansê re têdikoşe. Digel hemû serîlêdan û belgeyên ku nexweşîya wê nişan dide girtina wê didome. Eren banga tehlîyeya Tugluk li rayedaran kir û wiha got: ‘Divê hikûmet bi helwesta xwe ya cihêkar tevnegere. Ji bo vê em ji raya giştî piştgiriyê dixwazin. Divê Tugluk demildest bê berdan.’